A solución BANCADA é un desenvolvemento para dispor de maneira rápida de aplicacións web pequenas e medias sobre unha funcionalidade estándar acorde co patrón CRUD (mantemento de datos básico, xestión de permisos, conservación de datos históricos, procuras habituais, etc.). A partir dun modelo de datos que cumpra uns criterios predefinidos, a aplicación é capaz de xerar a lóxica básica necesaria para unha funcionalidade típica en contornas de xestión. A aplicación é parametrizable para ampliar esta funcionalidade básica con criterios de filtrado de información por roles, comportamento asociado a campos, etc.
BANCADA está pensado para poder dispor de maneira rápida dun desenvolvemento web acorde co patrón CRUD reutilizable de tal modo que a partir do modelo de datos físico atendendo a unhas regras (as táboas deben ter definidas as claves alleas no modelo de datos, certos campos deben chamarse dunha maneira determinada (código, activo, etc.), as táboas e columnas deben ter comentarios, etc.) a solución é capaz de xerar os metadatos necesarios para dispor duns menús básicos (menú principal, menú de táboas auxiliares, menú de táboas de metadatos, menú de administración e menú de vistas), xerar uns roles básicos (administrador, usuario e consulta), asociar as pantallas aos menus e aos permisos, dispor dunha lóxica de navegación entre táboas mestras, táboas detalle, etc., e a lóxica de actualización dos datos. Unha vez xerada, a aplicación é parametrizable en canto a engadir novos roles, opcións de menú, disparadores sobre campos, etc. Ademais un cambio no modelo de datos é inmediatamente incluído na aplicación mediante a rexeneración do modelo.
As vantaxes son o aforro en esforzo de programación, a homoxeneización de contornas (base de datos, servidor de aplicacións, etc.) e rapidez na implantación de solucións tipo CRUD vía web.
