En 2023, o 69% dos cidadáns da Unión Europea
de entre 16 e 74 anos utilizaron un sitio web ou unha aplicación dunha autoridade pública nos 12 meses anteriores.
Segundo reflicte a enquisa feita pública por Eurostat, a proporción varía moito entre os países da UE, rexistrándose as proporcións máis altas en Dinamarca (98%), Finlandia, os Países Baixos e Suecia (todos cun 95%). Pola contra, as porcentaxes máis baixas rexistráronse en Romanía (23%), Bulgaria (30 %) e Alemaña (58%). España sitúase por encima da media da UE, cun 80%.
Ao analizar con máis detalle as diferentes actividades de goberno electrónico revélase que, en 2023, o 42% das persoas utilizaron os servizos de goberno electrónico nos 12 meses anteriores para obter información sobre servizos, beneficios, leis, horarios de atención ou similares. Seguíronlle a descarga ou impresión de formularios oficiais (40%), o acceso a información persoal (39%) e a concertación dunha cita ou reserva e a recepción de comunicacións ou documentos oficiais (37%).
A proporción de persoas que presentaron declaracións de impostos en liña foi algo menor, do 29%. Do mesmo xeito, as cifras de acceso a bases de datos ou rexistros públicos foron do 19%, mentres que o 18% das persoas solicitou documentos ou certificados oficiais e o 17% solicitou beneficios ou dereitos en liña.
