O Ministerio de Xustiza lanza unha nova versión da aplicación que dá soporte ao Rexistro Estatal de Apoderamentos Xudiciais (REAJ) que mellorará a interoperabilidade coa Sede Electrónica Notarial, a través da cal os órganos xudiciais poden consultar a existencia e estado dos poderes procesuais autorizados polos notarios, así como a súa vixencia ou revogación.
Ademais, esta nova versión facilitará a presentación dos poderes en calquera das linguas cooficiais en todo o territorio nacional. Este servizo estará dispoñible na aplicación REAJ para a Oficina Xudicial durante a comparecencia presencial, aínda que, para a comparecencia electrónica, será necesaria a integración coa Sede Xudicial Electrónica, prevista para a próxima versión.
Por último, para garantir unha maior interoperabilidade, as comunidades autónomas poderán optar á integración do acceso a REAJ nos seus sistemas de xestión procesual. Isto permitirá ás oficinas xudiciais inscribir no arquivo de apoderamentos os poderes que se outorguen presencialmente nelas, así como como consultar, prorrogar, revogar ou renunciar calquera tipo de poder con independencia de cal fose a súa orixe.
O Ministerio de Xustiza prevé ademais, a integración deste servizo no Sistema de xestión procesual Atenea nas Comunidades nas que ten competencia.
